म्हसवड : नागरिकांचा एकमुखी सूर – “हवी म्हसवडकर नगराध्यक्षा!”
व्हिजन २४ तास न्यूज – म्हसवड प्रतिनिधी अहमद मुल्ला
म्हसवड :
म्हसवड नगरपरिषदेच्या आगामी पंचवार्षिक निवडणुकीसाठी जाहीर झालेल्या आरक्षणामुळे संपूर्ण शहरात नव्या राजकीय चर्चांना उधाण आले आहे. यंदा म्हसवड नगराध्यक्षपद “खुला महिला” या गटासाठी आरक्षित झाले असून, या निर्णयामुळे राजकीय समीकरणे अक्षरशः उलटीपालटी झाली आहेत.
शहरात सध्या सोशल मीडियावर, बाजारपेठांमध्ये आणि नागरी बैठकींमध्ये एकच चर्चेचा विषय आहे — “आता नगराध्यक्षा कोण?”
मात्र या चर्चेतून जनतेचा सूर एकमुखी उमटताना दिसतो — “हवी म्हसवडकर नगराध्यक्षा, बाहेरची नव्हे!”
गेल्या काही वर्षांत म्हसवड शहरात नागरी सुविधा, रस्ते, पाणीपुरवठा, वीज, आणि स्वच्छता यांसारख्या क्षेत्रांत किती प्रगती झाली आहे हे सगळ्यांना माहीतच आहे अजूनही शहरातील अनेक प्रलंबित प्रश्न आहेत . त्यामुळे नागरिकांचा ठाम विश्वास आहे की, शहराचा विकास फक्त स्थानिक नेतृत्वाच्या हातूनच शक्य आहे.
राजकीय पक्षांचे स्थानिक कार्यकर्ते व इच्छुक महिला उमेदवार यांचे सोशल मीडियावरून स्वतःच्या उमेदवारीचे संकेत देणे सुरू झाले आहे. फेसबुक, व्हॉट्सअॅप, इन्स्टाग्रामसारख्या माध्यमांवरून नागरिक थेट मतप्रदर्शन करताना दिसतात —
“आमचं शहर, आमची निवड — हवी म्हसवडकरच नगराध्यक्षा!”
काही मोठ्या पक्षांकडून बाहेरील महिला उमेदवाराला उमेदवारी मिळण्याची शक्यता व्यक्त केली जात असली, तरी स्थानिक नागरिकांनी यावर स्पष्ट मत नोंदवले आहे की,
“कोणीही असो, आमच्या नगराध्यक्षपदावर बसायचं असेल, तर ती म्हसवडची असावी!”
म्हसवडसारख्या ऐतिहासिक व वाढत्या शहरात स्थानिक नेतृत्वाला संधी मिळावी, या अपेक्षेने सर्वसामान्य नागरिक, व्यावसायिक, महिला गट, आणि युवा वर्ग एकत्र येताना दिसत आहेत.
जनतेच्या भावना:
“आमची नगराध्यक्षा आमच्यातलीच असावी!”
“म्हसवडचा विकास म्हसवडकरांच्या हातूनच व्हावा!”
“पक्ष काहीही असो, नगराध्यक्षा स्थानिक असावी!”
आता सर्वांचे लक्ष शहरातील मोठ्या राजकीय पक्षांच्या निर्णयाकडे लागले आहे —
ते स्थानिकांच्या भावनेचा सन्मान करतील का,
की पुन्हा बाहेरच्यांवर विश्वास ठेवतील?
म्हसवडच्या नागरिकांच्या अपेक्षा आणि भावना पाहता, यंदाची नगराध्यक्षपदाची लढत ऐतिहासिक ठरणार, हे नक्कीच म्हणता येईल
