सिद्धनाथ हायस्कूल व ज्युनिअर कॉलेजमध्ये आंतरराष्ट्रीय योग दिन उत्साहात

व्हिजन २४ तास न्यूज 

म्हसवड, प्रतिनिधी :

फलटण एज्युकेशन सोसायटीच्या सिद्धनाथ हायस्कूल व ज्युनिअर कॉलेज, म्हसवड येथे 21 जून रोजी आंतरराष्ट्रीय योग दिन मोठ्या उत्साहात आणि प्रेरणादायी वातावरणात साजरा करण्यात आला. विद्यार्थ्यांमध्ये योगाविषयी जागरूकता निर्माण करण्यासाठी आयोजित करण्यात आलेल्या या कार्यक्रमास शिक्षक, शिक्षकेतर कर्मचारी आणि विद्यार्थ्यांचा उत्स्फूर्त प्रतिसाद लाभला.

कार्यक्रमाच्या प्रारंभी प्राचार्य प्रवीण दासरे यांनी योगाचे महत्त्व, त्याचे शारीरिक व मानसिक आरोग्यावर होणारे सकारात्मक परिणाम याविषयी मार्गदर्शन केले . त्यानंतर योग प्रशिक्षक वैशाली मनोज ओतारी व मनोज ओतारी यांनी विविध योगासने, प्राणायाम आणि ध्यानाच्या पद्धतींचे प्रात्यक्षिक सादर केले. त्यांच्या मार्गदर्शनाखाली विद्यार्थ्यांनी आणि शिक्षकांनी सामूहिक योगाभ्यास करून निरोगी जीवनशैलीचा संदेश दिला.

यावेळी विद्यालयाचे प्राचार्य, उपप्राचार्य, माध्यमिक व उच्च माध्यमिक विभागातील शिक्षक प्रतिनिधी, सर्व शिक्षक-शिक्षिका, शिक्षकेतर कर्मचारी तसेच मोठ्या संख्येने विद्यार्थी-विद्यार्थिनी उपस्थित होते. योगामुळे शारीरिक तंदुरुस्तीबरोबरच मानसिक स्थैर्य, एकाग्रता आणि सकारात्मक विचारसरणी विकसित होते, असे मत उपस्थित मान्यवरांनी व्यक्त केले.

कार्यक्रमामुळे विद्यार्थ्यांमध्ये योगाबद्दल विशेष उत्सुकता निर्माण झाली असून नियमित योगाभ्यास करण्याचा संकल्प अनेक विद्यार्थ्यांनी व्यक्त केला. शिस्तबद्ध वातावरणात पार पडलेल्या या उपक्रमामुळे विद्यालय परिसरात आरोग्य, तंदुरुस्ती आणि सकारात्मकतेचा संदेश देण्यात आला.

आंतरराष्ट्रीय योग दिनानिमित्त आयोजित या उपक्रमाने “योग करा, निरोगी रहा” हा संदेश प्रभावीपणे विद्यार्थ्यांपर्यंत पोहोचवला. विद्यालयाच्या या उपक्रमाचे पालक व नागरिकांकडूनही कौतुक करण्यात येत आहे.