म्हसवड नगरपरिषदेत स्वातंत्र्य दिन उत्साहात साजरा; सफाई कर्मचाऱ्याच्या हस्ते ध्वजारोहण

व्हिजन २४ तास न्यूज 

म्हसवड :प्रतिनिधी 

भारतीय स्वातंत्र्याचा ८०वा वर्धापनदिन म्हसवड नगरपरिषदेच्या वतीने देशभक्तीमय आणि उत्साहपूर्ण वातावरणात साजरा करण्यात आला. यंदाच्या स्वातंत्र्य दिनाचे वैशिष्ट्य म्हणजे शहराच्या स्वच्छतेसाठी अहोरात्र कार्यरत असलेल्या सफाई कर्मचाऱ्याच्या हस्ते ध्वजारोहण करून त्यांच्या कार्याचा सन्मान करण्यात आला.

म्हसवड नगरपरिषदेच्या लोकनियुक्त नगराध्यक्ष सौ. पुजाताई सचिन विरकर यांच्या वतीने यावर्षी ध्वजारोहणाचा मान नगरपरिषदेचे सफाई कर्मचारी श्री. मंगल सरतापे यांना देण्यात आला. शहर स्वच्छ व सुंदर ठेवण्यासाठी सफाई कर्मचारी बजावत असलेल्या महत्त्वपूर्ण भूमिकेची दखल घेत त्यांना हा सन्मान देण्यात आला. या निर्णयाचे उपस्थित नागरिकांनी कौतुक केले.

ध्वजारोहणानंतर राष्ट्रगीताने वातावरण भारावून गेले. यावेळी म्हसवड शहरातील विविध शाळा व विद्यालयांनी उत्स्फूर्त सहभाग घेत स्वातंत्र्य दिनाचा उत्साह द्विगुणित केला. विद्यार्थ्यांनी देशभक्तीपर गीते, भाषणे, सांस्कृतिक कार्यक्रम तसेच विविध देशभक्तीपर सादरीकरणे करून उपस्थितांची मने जिंकली.

विविध शाळांमधील विद्यार्थ्यांनी आकर्षक वेशभूषेत सादर केलेल्या कार्यक्रमांना उपस्थितांकडून उत्स्फूर्त दाद मिळाली. चिमुकल्या विद्यार्थ्यांपासून माध्यमिक व उच्च माध्यमिक विद्यार्थ्यांपर्यंत सर्वांनी देशप्रेम, राष्ट्रभक्ती आणि सामाजिक एकतेचा संदेश आपल्या सादरीकरणातून दिला. विद्यार्थ्यांच्या उत्साहामुळे संपूर्ण नगरपरिषद परिसरात देशभक्तीचे आणि आनंदाचे वातावरण निर्माण झाले.

स्वातंत्र्य दिनाच्या निमित्ताने शहरातील नागरिक, विद्यार्थी, शिक्षक, पालक, नगरपरिषद अधिकारी-कर्मचारी आणि विविध क्षेत्रातील मान्यवर मोठ्या संख्येने उपस्थित होते. तिरंग्याच्या साक्षीने झालेल्या या कार्यक्रमामुळे म्हसवड शहरात राष्ट्रीय एकात्मता आणि देशभक्तीची भावना अधिक दृढ झाली.

कार्यक्रमाच्या यशस्वी आयोजनासाठी सहभागी झालेल्या सर्व शाळा, मुख्याध्यापक, शिक्षक, विद्यार्थी, पालक, नगरपरिषद अधिकारी-कर्मचारी तसेच नागरिकांचे म्हसवड नगरपरिषदेकडून मनःपूर्वक आभार व्यक्त करण्यात आले.

सफाई कर्मचाऱ्याच्या हस्ते ध्वजारोहण करून त्यांच्या कष्टाचा सन्मान करण्याचा उपक्रम हा यंदाच्या स्वातंत्र्य दिन सोहळ्याचे विशेष आकर्षण ठरला.