कृष्णा कारखाना निवडणुकीच्या पार्श्वभूमीवर भोसले-उंडाळकर गट एकत्र येण्याच्या चर्चांना उधाण

व्हिजन २४ तास न्यूज 

कराड प्रतिनिधी :

डॉ. सुरेश भोसले आणि आ. अतुल भोसले यांची कराड बाजार समिती परिसरात झालेली अनौपचारिक भेट आणि चहापानामुळे कृष्णा सहकारी साखर कारखान्याच्या आगामी निवडणुकीच्या राजकारणात नव्या चर्चांना उधाण आले आहे. अनेक वर्षांपासून स्वतंत्र राजकीय भूमिका घेत असलेल्या भोसले आणि उंडाळकर गटांमध्ये अखेर समन्वय होणार का, याबाबत कार्यकर्त्यांमध्ये उत्सुकता निर्माण झाली आहे.

बाजार समितीतील या भेटीदरम्यान दोन्ही नेत्यांमध्ये सध्याच्या राजकीय परिस्थितीवर चर्चा झाल्याचे सांगितले जात आहे. विशेष म्हणजे कृष्णा कारखान्याची निवडणूक जवळ येत असताना झालेल्या या भेटीकडे राजकीय वर्तुळाचे लक्ष लागले आहे. कारखान्याच्या सत्तासमीकरणात बदल होण्याची शक्यता व्यक्त केली जात असून, दोन्ही गटातील काही प्रमुख पदाधिकाऱ्यांनीही यावेळी उपस्थिती लावल्याने चर्चांना अधिकच बळ मिळाले.

दरम्यान, या भेटीबाबत अधिकृतरीत्या कोणतीही राजकीय घोषणा करण्यात आलेली नसली तरी “राजकारणात काहीही अशक्य नसते” अशी प्रतिक्रिया कार्यकर्त्यांकडून व्यक्त होत आहे. आगामी काळात भोसले-उंडाळकर गटाची भूमिका काय राहणार, याकडे आता तालुक्यासह जिल्ह्याचे लक्ष लागले आहे.