यशराजदादा देसाई यांच्या वाढदिवसानिमित्त म्हसवडमध्ये जीवनावश्यक वस्तूंच्या किटचे वाटप

व्हिजन २४ तास न्यूज 

म्हसवड (प्रतिनिधी) :

दुष्काळाच्या झळांनी होरपळलेल्या माण तालुक्यातील गरजू कुटुंबांना दिलासा देण्यासाठी बाळासाहेब देसाई सहकारी साखर कारखान्याचे चेअरमन व युवा नेते मा. यशराजदादा देसाई यांच्या वाढदिवसानिमित्त जीवनावश्यक वस्तूंच्या किटचे वाटप करण्यात आले.
सहा जानेवारी रोजी म्हसवड येथे माण तालुका शिवसेनेचे अध्यक्ष बाळासाहेब मुलानी यांच्या अध्यक्षतेखाली हा सामाजिक उपक्रम पार पडला. वाढदिवसावर अनावश्यक खर्च न करता गरजूंच्या मदतीसाठी पुढाकार घेण्याच्या या उपक्रमाचे उपस्थितांनी कौतुक केले.

माण तालुका हा कायमच दुष्काळी परिस्थितीचा सामना करणारा भाग म्हणून ओळखला जातो. पावसाच्या अनिश्चिततेमुळे शेती, शेतमजुरी आणि रोजगारावर अवलंबून असलेल्या कुटुंबांना आर्थिक संकटाचा सामना करावा लागतो. अशा परिस्थितीत जीवनावश्यक वस्तूंच्या किटच्या माध्यमातून गरजू कुटुंबांना मदतीचा हात देण्याचा प्रयत्न या उपक्रमातून करण्यात आला.

यावेळी बोलताना माण तालुका शिवसेनेचे अध्यक्ष बाळासाहेब मुलानी म्हणाले की, दुष्काळाच्या तीव्र झळांमुळे माण तालुक्यातील शेतकरी, शेतमजूर, कामगार आणि कष्टकरी जनता मोठ्या संकटात सापडली आहे. शेतकऱ्यांचे आर्थिक गणित पूर्णपणे कोलमडले असून, अनेक कुटुंबांना दैनंदिन गरजा भागवतानाही अडचणींचा सामना करावा लागत आहे. अशा प्रतिकूल परिस्थितीत गरजू जनतेच्या मदतीला धावून जाणे ही काळाची गरज आहे.

मा. यशराजदादा देसाई यांनी वाढदिवसानिमित्त अनावश्यक खर्च टाळून दुष्काळग्रस्त माण तालुक्यातील जनतेसाठी मदतीचा उपक्रम राबविला. जनतेप्रती असलेली कृतज्ञता व्यक्त करण्याचा आणि सामाजिक बांधिलकी जपण्याचा हा प्रयत्न आहे. या माध्यमातून करण्यात आलेली मदत छोटी असली, तरी संकटाच्या काळात ती गरजू कुटुंबांसाठी नक्कीच दिलासादायक ठरेल, असा विश्वास मुलानी यांनी व्यक्त केला.

यावेळी त्यांनी माण तालुक्यातील जनतेच्या वतीने यशराजदादा देसाई यांना वाढदिवसाच्या शुभेच्छा दिल्या. दीनदलित, शोषित, पीडित आणि गरजू जनतेच्या डोळ्यांतील अश्रू पुसण्याचे सामर्थ्य त्यांना आई जगदंबेने द्यावे, तसेच समाजातील वंचित घटकांची सेवा करण्यासाठी त्यांना उत्तम आरोग्य, दीर्घायुष्य आणि बळ लाभावे, अशा सदिच्छाही त्यांनी व्यक्त केल्या.

जीवनावश्यक वस्तूंच्या किटचे वाटप होत असताना लाभार्थ्यांच्या चेहऱ्यावर आनंद आणि समाधान दिसून येत होते. मदतीच्या या उपक्रमाबद्दल लाभार्थ्यांनी मा.यशराजदादा देसाई यांच्याप्रती कृतज्ञता व्यक्त करत त्यांना वाढदिवसाच्या शुभेच्छा दिल्या. अडचणीच्या काळात मिळालेली मदत महत्त्वाची असल्याची भावना यावेळी लाभार्थ्यांनी व्यक्त केली.

समाजातील गरजू घटकांना मदत करणे, त्यांच्या अडचणी समजून घेणे आणि संकटाच्या काळात त्यांच्या पाठीशी उभे राहणे, हीच खरी सामाजिक बांधिलकी आहे. याच भावनेतून जीवनावश्यक वस्तूंच्या किटचे वाटप करून गरजू कुटुंबांना मदतीचा हात देण्यात आला. वाढदिवसाचा आनंद सामाजिक उपक्रमातून साजरा करण्याचा हा प्रयत्न इतरांसाठीही प्रेरणादायी ठरणारा आहे.

या कार्यक्रमाला युवासेनेचे तालुकाप्रमुख हनुमंत राजगे, शहरप्रमुख शिवदास केवटे, विभागप्रमुख सूरज काटकर, विभागप्रमुख सुखदेव धुमाळ यांच्यासह शिवसेनेचे पदाधिकारी आणि कार्यकर्ते मोठ्या संख्येने उपस्थित होते. उपस्थित पदाधिकारी व कार्यकर्त्यांच्या सहभागातून हा उपक्रम उत्साहात पार पडला.