महिला सक्षमीकरणात पुरुषांचेही महत्त्वपूर्ण योगदान – डॉ. विश्वास वळवी

व्हिजन २४ तास न्यूज संपादक अहमद मुल्ला 

म्हसवड, प्रतिनिधी :
दरवर्षी ८ मार्च रोजी जगभरात जागतिक महिला दिन साजरा केला जातो. हा दिवस केवळ महिलांच्या अधिकारांचा आणि त्यांच्या कर्तृत्वाचा गौरव करण्यापुरता मर्यादित नसून समाजातील सर्व घटकांनी, विशेषतः पुरुषांनी, महिलांच्या सक्षमीकरणात दिलेल्या योगदानाची जाणीव करून देणारा दिवस असल्याचे मत लेखक व संशोधक डॉ. विश्वास वळवी यांनी व्यक्त केले आहे.

सामाजिक अभ्यासांनुसार महिलांच्या शिक्षण, स्वावलंबन आणि सामाजिक विकासामध्ये पुरुषांचे प्रत्यक्ष व अप्रत्यक्ष योगदान ६० ते ७० टक्क्यांपेक्षा अधिक असल्याचे दिसून येते. महिलांच्या प्रगतीची सुरुवात प्रामुख्याने कुटुंबातून होत असते. वडील मुलीला शिक्षणासाठी प्रोत्साहन देतात, भाऊ बहिणीच्या स्वप्नांना पाठिंबा देतो, तर पती पत्नीच्या करिअर आणि व्यक्तिमत्त्व विकासासाठी साथ देतो. या सकारात्मक दृष्टिकोनामुळे महिलांना आत्मविश्वास, सुरक्षितता आणि संधी मिळून त्या समाजाच्या विविध क्षेत्रांत यश संपादन करू शकतात.

इतिहासात अनेक समाजसुधारकांनी स्त्री शिक्षण, समान हक्क, सामाजिक न्याय आणि सन्मानासाठी मोठे कार्य केले. त्यामुळे महिलांना शिक्षण, रोजगार, राजकारण, विज्ञान, क्रीडा आणि प्रशासन अशा विविध क्षेत्रांत आपले स्थान निर्माण करता आले. आज अनेक यशस्वी महिलांच्या कामगिरीमागे त्यांच्या कुटुंबातील पुरुषांचे प्रेरणादायी सहकार्य हे महत्त्वाचे कारण असल्याचेही त्यांनी नमूद केले.

महिला सक्षमीकरणाचा खरा अर्थ म्हणजे स्त्री-पुरुष समानतेवर आधारित समाजाची निर्मिती होय. हा प्रवास केवळ महिलांचा किंवा पुरुषांचा नसून दोघांच्या परस्पर सहकार्याने आणि सन्मानानेच पूर्ण होऊ शकतो. पुरुषांनी महिलांच्या स्वप्नांना पाठिंबा देत समानतेचे वातावरण निर्माण केले, तर समाज अधिक न्याय्य, प्रगत आणि समृद्ध होईल, असेही डॉ. वळवी यांनी सांगितले.

जागतिक महिला दिन हा स्त्री-पुरुष सहकार्याच्या शक्तीची जाणीव करून देणारा दिवस असून समानता, सन्मान आणि संधी यांवर आधारित समाज निर्माण करण्याचा संकल्प सर्वांनी करावा, असे आवाहनही त्यांनी केले.