पावन भूमी कारखेल येथे शिवजयंतीचा अभूतपूर्व भव्य सोहळा सरसेनापती संताजी घोरपडे समाधी स्थळी दिमाखदार उत्सव; शिवप्रेमींचा उस्फूर्त सहभाग

व्हिजन २४ तास न्यूज संपादक अहमद मुल्ला
म्हसवड : प्रतिनिधी

        माण तालुक्यातील ऐतिहासिक आणि पावन भूमी म्हणून ओळखल्या जाणाऱ्या कारखेल (ता. माण) येथील सरसेनापती संताजी घोरपडे यांच्या समाधी स्थळी यंदाची छत्रपती शिवाजी महाराज जयंती अभूतपूर्व उत्साहात, दिमाखदार वातावरणात आणि जल्लोषपूर्ण पद्धतीने साजरी करण्यात आली. संपूर्ण परिसर भगव्या पताकांनी सजला होता. “जय भवानी, जय शिवाजी”च्या घोषणांनी आसमंत दुमदुमून गेला होता. शिवभक्तांच्या उत्स्फूर्त सहभागामुळे समाधी स्थळ परिसर शिवमय झाला होता.

     या सोहळ्यास मा. ना. महादेव जानकर यांची प्रमुख उपस्थिती लाभली. त्यांच्या आगमनाने कार्यक्रमाला विशेष उंची प्राप्त झाली. शिवचरित्र आणि राष्ट्राभिमानाच्या विचारांनी भारलेल्या वातावरणात त्यांनी उपस्थितांना मार्गदर्शन केले. त्यांच्या भाषणातून शिवरायांचे राष्ट्रनिर्माणातील योगदान, स्वाभिमानाची जपणूक आणि युवकांनी इतिहासातून प्रेरणा घेण्याची गरज अधोरेखित करण्यात आली.

     कार्यक्रमाचा एक प्रमुख आकर्षण ठरलेली विद्यार्थ्यांची वक्तृत्व स्पर्धा अत्यंत रंगतदार झाली. लहानग्या विद्यार्थ्यांपासून युवकांपर्यंत सर्व स्पर्धकांनी शिवचरित्र, स्वराज्याची संकल्पना आणि संताजी घोरपडे यांच्या शौर्यगाथेवर प्रभावी, ओजस्वी आणि अभ्यासपूर्ण भाषणे सादर केली. त्यांच्या शब्दांतून प्रकट झालेला इतिहासाभिमान आणि देशप्रेम यामुळे उपस्थितांची मने जिंकली गेली.

      यानंतर पार पडलेला बक्षीस वितरण सोहळा मोठ्या थाटामाटात संपन्न झाला. मान्यवरांच्या हस्ते विजेत्या विद्यार्थ्यांना सन्मानचिन्हे आणि प्रमाणपत्रे देऊन गौरविण्यात आले. उपस्थित मान्यवरांनी संताजी घोरपडे यांच्या पराक्रमाची उजळणी करत या पवित्र समाधी स्थळाच्या सर्वांगीण विकासाची आवश्यकता अधोरेखित केली. ऐतिहासिक वारसा जपण्यासाठी स्थानिक प्रशासन आणि शासनाने ठोस पावले उचलावीत, अशी भावना यावेळी व्यक्त करण्यात आली.

    “शिवप्रेरणा – सरसेनापती संताजी घोरपडे शिवजयंती उत्सव समिती, माण” चे अध्यक्ष तथा सामाजिक कार्यकर्ते सोहम शिर्के यांनी आपल्या मनोगतात ठाम भूमिका मांडली. ही शिवजयंती साजरी करण्याचे पहिले वर्ष असून समाधी स्थळाचा सर्वांगीण विकास होईपर्यंत आमचा लढा सुरूच राहील, असा निर्धार त्यांनी व्यक्त केला. पुढील वर्षी शिवजयंती आणखी मोठ्या प्रमाणावर, अधिक भव्य आणि ऐतिहासिक स्वरूपात साजरी करण्यात येईल, असा विश्वास त्यांनी उपस्थितांना दिला.

        कार्यक्रमास परिसरातील नागरिक, युवक-युवती, महिला आणि शिवप्रेमी मोठ्या संख्येने उपस्थित होते. शिस्तबद्ध नियोजन, आकर्षक सजावट आणि उत्साही सहभाग यामुळे संपूर्ण वातावरण प्रेरणादायी व अभिमानाने भारलेले होते. कारखेलची ही पावन भूमी शिवभक्तांच्या एकजुटीने आणि स्वराज्याच्या प्रेरणेने पुन्हा एकदा उजळून निघाली.