जिद्द, कर्तृत्व आणि आत्मविश्वासाचा सन्मान! अधारिका फाउंडेशनच्या ‘नवदुर्गा पुरस्कारां’तून नऊ दृष्टिहीन महिलांचा गौरव

व्हिजन २४ तास न्यूज 

मुंबई, कांदिवली : (विनायक मोरे )
शिक्षण, क्रीडा, कला, संशोधन आणि समाजसेवेच्या क्षेत्रात उल्लेखनीय कामगिरी करणाऱ्या नऊ दृष्टिहीन महिलांचा अधारिका फाउंडेशनच्या वतीने ‘नवदुर्गा पुरस्कार’ देऊन सन्मान करण्यात आला. कांदिवली येथे आयोजित विशेष फॅन्सी ड्रेस गरबा कार्यक्रमात हा गौरव सोहळा उत्साहात पार पडला. या पुरस्कारांनी दृष्टिहीन महिलांची जिद्द, आत्मविश्वास, कर्तृत्व आणि समाजाप्रती असलेले योगदान अधोरेखित केले.

या पुरस्काराच्या मानकरी म्हणून तृप्ती सुनील वजरानी, नेहा नलीन पावसकर, पायल श्रीगोपाल भट्टाड, कोमल पाटील, परिमळा विष्णू भट, सिद्धी तोरस्कर, डॉ. उर्वी जंगम, रुजूल गोयथळे आणि उम्मेहानी बागसरावाला यांचा सन्मान करण्यात आला. प्रतिकूल परिस्थितीवर मात करत विविध क्षेत्रांत यश संपादन करणाऱ्या या महिलांनी आपल्या कर्तृत्वातून समाजासमोर प्रेरणादायी आदर्श निर्माण केला आहे.

तृप्ती वजरानी यांनी आंतरराष्ट्रीय बुद्धिबळ आणि गोलबॉल स्पर्धांमध्ये भारताचे प्रतिनिधित्व केले आहे, तर नेहा पावसकर यांनी क्षितिधर शिखर सर करून विश्वविक्रम नोंदवला आहे. पायल भट्टाड या पीएच.डी. संशोधक असून बँकिंग क्षेत्रात कार्यरत आहेत. कोमल पाटील यांनी मल्लखांब आणि टँडम सायकलिंगमध्ये उल्लेखनीय कामगिरी केली आहे.

दृष्टिहीन विद्यार्थ्यांच्या मदतीसाठी परिमळा भट यांनी ‘स्नेहांकित हेल्पलाइन’ची स्थापना केली आहे. सिद्धी तोरस्कर नृत्य आणि नाट्यकलेच्या माध्यमातून विशेष गरजा असलेल्या मुलांसाठी कार्य करतात. डॉ. उर्वी जंगम यांनी जर्मन स्टडीजमध्ये पीएच.डी. मिळवणाऱ्या भारतातील पहिल्या अंध महिला म्हणून ऐतिहासिक कामगिरी केली आहे.

विद्यार्थिनी रुजूल गोयथळे हिने दहावीच्या परीक्षेत ९०.४० टक्के गुण मिळवत शैक्षणिक क्षेत्रात यश संपादन केले आहे. तर उम्मेहानी बागसरावाला यांच्या ‘Pearls of Vision’ या उपक्रमातून दृष्टिहीन विद्यार्थ्यांना शिक्षण, तंत्रज्ञान आणि रोजगाराच्या संधी उपलब्ध करून देण्याचे महत्त्वपूर्ण कार्य केले जात आहे.

या पुरस्कार सोहळ्यासोबत आयोजित फॅन्सी ड्रेस गरबा कार्यक्रमात दृष्टिहीन मित्र-मैत्रिणींनी उत्स्फूर्त सहभाग नोंदवला. संगीत, नृत्य आणि विविध वेशभूषांच्या माध्यमातून सहभागी महिलांनी आपली कला, प्रतिभा आणि आत्मविश्वासाचे दर्शन घडवले. हा कार्यक्रम केवळ नवरात्रोत्सवापुरता मर्यादित न राहता समावेशकता, समान संधी आणि स्वावलंबनाचा संदेश देणारा ठरला.

दृष्टिहीन व्यक्तींना सन्मानाचे आणि आत्मनिर्भर जीवन जगता यावे, हा अधारिका फाउंडेशनचा मुख्य उद्देश आहे. शिक्षण, कौशल्यविकास आणि रोजगाराच्या संधी उपलब्ध करून देण्याबरोबरच फाउंडेशनने टेलिकॉलिंग प्रकल्पाच्या माध्यमातून दृष्टिहीन व्यक्तींसाठी रोजगारनिर्मितीचा उपक्रमही हाती घेतला आहे.

‘नवदुर्गा पुरस्कार’ हा केवळ नऊ महिलांचा सन्मान नसून त्यांच्या संघर्षाचा, जिद्दीचा आणि असामान्य कर्तृत्वाचा गौरव आहे. शारीरिक मर्यादांवर मात करून स्वतःच्या क्षमतेच्या बळावर यश मिळवणाऱ्या या महिलांनी समाजाला प्रेरणा दिली आहे. त्यांच्या कार्याची दखल घेत अधारिका फाउंडेशनने समावेशक आणि समान संधी असलेल्या समाजनिर्मितीच्या दिशेने महत्त्वपूर्ण पाऊल उचलले आहे.