६१३६ वाचकपत्रांतून समाजप्रबोधन; माया भाटकर यांच्या लेखणीचा राष्ट्रीय स्तरावर सन्मान!

व्हिजन २४ तास न्यूज
प्रतिनिधी : (गणेश तळेकर )

सामाजिक प्रश्नांना वाचा फोडत, अन्यायाविरोधात निर्भीड भूमिका मांडत आणि जनजागृतीचा वसा अखंडपणे जपत पत्रलेखन करणाऱ्या सौ. माया हेमंत भाटकर यांच्या उल्लेखनीय कार्याचा राष्ट्रीय स्तरावर गौरव झाला आहे. गेल्या सलग २७ वर्षांत त्यांनी तब्बल ६१३६ वाचकपत्रे लिहून समाजप्रबोधन केले असून, त्यांच्या या कार्याची ‘इंडिया बुक ऑफ रेकॉर्ड्स’ने दखल घेत त्याची नोंद प्रमाणित केली आहे. त्यांच्या सातत्यपूर्ण आणि प्रभावी लेखनामुळे सामाजिक बांधिलकी जपणाऱ्या लेखणीचा राष्ट्रीय स्तरावर सन्मान झाला आहे.

सामाजिक प्रश्न, शैक्षणिक सुधारणा, वित्तीय धोरणे, सायबर सुरक्षा, लोकप्रतिनिधींची जबाबदारी, कौटुंबिक सुसंवाद, महिलांवरील अत्याचार, महिलांचे हक्क, सामाजिक अनिष्ट प्रथा आणि नागरिकांच्या दैनंदिन समस्या अशा विविध विषयांवर भाटकर यांनी आपल्या लेखणीतून परखड भाष्य केले आहे. मराठी, हिंदी आणि इंग्रजी या तीन भाषांमध्ये त्यांनी लिहिलेल्या पत्रांना विविध दैनिकांमधून प्रसिद्धी मिळाली आहे. समाजातील महत्त्वाच्या प्रश्नांकडे प्रशासनाचे, लोकप्रतिनिधींचे आणि सर्वसामान्य नागरिकांचे लक्ष वेधण्याचे काम त्यांनी सातत्याने केले आहे.

‘पत्रलेखन हेच माझे ईकेगाई—जीवनध्येय!’

पत्रलेखनाकडे केवळ अभिव्यक्तीचे माध्यम म्हणून न पाहता, समाजहितासाठीचे जीवनध्येय म्हणून पाहणाऱ्या माया भाटकर यांची ही भूमिका त्यांच्या कार्यातून स्पष्ट होते. समाजातील प्रश्नांवर जागरूकपणे लक्ष ठेवून ते प्रभावी शब्दांत मांडणे आणि त्यातून सकारात्मक बदल घडविण्यास हातभार लावणे, हा त्यांच्या लेखनाचा मुख्य उद्देश राहिला आहे. राष्ट्रीय स्तरावर मिळालेल्या या मान्यतेनंतरही पत्रलेखनाचा हा वसा अखंडपणे पुढे सुरू ठेवण्याचा त्यांचा निर्धार आहे.

शैक्षणिक, सहकार आणि सामाजिक क्षेत्रातही उल्लेखनीय योगदान

पत्रलेखनासोबतच सौ. माया भाटकर यांनी शैक्षणिक आणि सामाजिक क्षेत्रातही महत्त्वपूर्ण योगदान दिले आहे. मुंबई विद्यापीठाच्या सिनेट आणि मॅनेजमेंट कौन्सिलच्या सदस्यपदाची जबाबदारी त्यांनी सांभाळली आहे. सध्या त्या जनकल्याण सहकारी बँकेच्या संचालक मंडळावर संचालक म्हणून कार्यरत आहेत. ग्रामीण भागातील विविध विकास प्रकल्पांमध्येही त्यांचा सक्रिय सहभाग आहे.

विविध संस्थात्मक जबाबदाऱ्या सांभाळताना सामाजिक प्रश्नांबाबतची संवेदनशीलता आणि लेखनाची आवड त्यांनी कायम जपली आहे. महिलांच्या प्रश्नांपासून ते नागरिकांच्या मूलभूत समस्यांपर्यंत विविध विषयांना आपल्या पत्रांतून स्थान देत त्यांनी जनजागृतीचा प्रयत्न केला आहे.

६१३६ पत्रांचा हा प्रवास केवळ आकड्यांपुरता मर्यादित नसून, समाजातील प्रश्न मांडण्याच्या आणि लोकशाहीतील जागरूक नागरिकाची भूमिका बजावण्याच्या सातत्यपूर्ण ध्यासाचे प्रतीक आहे. त्यांच्या या कार्याला राष्ट्रीय स्तरावर मिळालेली मान्यता ही सामाजिक बांधिलकी जपणाऱ्या लेखणीसाठी निश्चितच प्रेरणादायी ठरली आहे.