शिक्षिकेचा विनयभंग, मारहाण व धमकी प्रकरणी सरकारी डॉक्टरवर गुन्हा दाखल

व्हिजन २४ तास न्यूज संपादक अहमद मुल्ला
म्हसवड : प्रतिनिधी
भालवडी (ता. माण) येथील जिल्हा परिषद प्राथमिक शाळेतील महिला शिक्षिकेच्या विनयभंग, मारहाण व धमकीप्रकरणी शिंगणापूर आरोग्य केंद्रातील वैद्यकीय अधिकारी प्रमोद नारायण नारायणे (रा. मर्डी, ता. माण) याच्यावर म्हसवड पोलीस ठाण्यात गुन्हा दाखल करण्यात आला आहे.

ही घटना बुधवार, दिनांक 23 जुलै 2025 रोजी सकाळी 10.45 वाजण्याच्या सुमारास घडली. फिर्यादी शिक्षिका निर्भया (वय 44, सध्या राहणार केदार पार्क, दहिवडी) या आपल्या शाळेमध्ये कार्यरत असताना आरोपी प्रमोद नारायणे (दिर ) यांनी शाळेत येऊन त्यांना मुख्यालयात न राहण्याच्या तक्रारीसंदर्भात जाब विचारत हाताने मारहाण केली. तसेच शिवीगाळ करत जीवे मारण्याची धमकी दिली.

यावेळी त्यांनी फिर्यादीच्या साडीचा पदर आणि ब्लाऊज ओढत त्यांच्या मनास लज्जा उत्पन्न होईल असे कृत्य केले. तसेच त्यांच्या हातातील खडू फेकून देत शासकीय कामात अडथळा निर्माण केला. याप्रकरणी भादंवि नव्या BNS कायद्यानुसार कलम 74, 221, 115(2), 351(2)(3), 352 अंतर्गत गुन्हा दाखल करण्यात आला आहे.

या प्रकरणाचा तपास पोलीस निरीक्षक सोनवणेयांचे मार्गदर्शनाखाली म.पो.ह. फडतरे करत असून आरोपी अद्याप अटकेत नाही. पुढील कारवाई सुरू असल्याचे पोलीस निरीक्षक सोनवणे यांनी सांगितले.