श्री सिद्धनाथ मंदिरात काळे परिवाराकडून दरवर्षीप्रमाणे याही वर्षी उपवासाची खिचडी व फळांचा महाप्रसाद
व्हिजन २४ तास न्यूज संपादक अहमद मुल्ला
म्हसवड – प्रतिनिधी
म्हसवड येथील श्री सिद्धनाथ व माता जोगेश्वरी नवरात्र उत्सवाच्या निमित्ताने दरवर्षीप्रमाणे याही वर्षी श्री सिद्धनाथ मंदिरात उपवासाच्या दिवशी भाविक भक्तांसाठी खिचडी व फळांचा महाप्रसाद आयोजित करण्यात आला आहे.
हा सामाजिक उपक्रम म्हसवड शहरातील सामाजिक कार्यकर्ते श्री अशोक काळे यांच्या पुढाकारातून रविवार, दि. २६ ऑक्टोबर २०२५ रोजी सकाळपासून दिवसभर मंदिर परिसरात राबविण्यात येणार आहे. दरवर्षीप्रमाणेच मंदिरात येणाऱ्या सर्व भाविकांना उपवासाची खिचडी, फळे व पाणी यांचे वाटप करून सेवा करण्यात येणार आहे.
श्री काळे यांनी सांगितले की, “श्री सिद्धनाथ महाराज आणि माता जोगेश्वरी यांच्या कृपेने प्रत्येक वर्षी नवरात्र उत्सवात आम्ही भक्तांसाठी उपवास महाप्रसादाचे आयोजन करतो. हे केवळ धार्मिक कार्य नसून समाजसेवा आहे. उपवासाच्या दिवशी येणाऱ्या प्रत्येक भाविकाला समाधान मिळावे हीच आमची इच्छा आहे.”
मंदिर परिसरात सकाळपासूनच भक्तांची गर्दी अपेक्षित असून, प्रसाद वितरणासाठी स्वयंसेवकांची स्वतंत्र व्यवस्था केली गेली आहे. खिचडी व फळे वाटप करण्याचे हे कार्य श्री सिद्धनाथ मंदिर परिसरात पार पडते, आणि यासाठी काळे परिवार व स्थानिक तरुण कार्यकर्ते स्वतः उपस्थित राहतात.
या सामाजिक परंपरेला आता पंचक्रोशीतून मोठा प्रतिसाद मिळत असून, दरवर्षी हजारो भाविक या दिवशी उपवास महाप्रसादाचा लाभ घेतात.
श्री सिद्धनाथ–माता जोगेश्वरी नवरात्र उत्सवाचा उत्साह सध्या चरमसीमेवर असून, मंदिर परिसरात “ सिद्धनाथाच्या नावानं चांगभलं!” या जयघोषांनी वातावरण भक्तिमय झाले आहे.
