म्हसवडमध्ये रमजान ईद निमित्त जनश्री फाउंडेशनच्या वतीने खजूर वाटपाचा उपक्रम
व्हिजन २४ तास न्यूज (संपादक अहमद मुल्ला )
म्हसवड :(प्रतिनिधी )
रमजान ईद निमित्त जनश्री फाउंडेशनच्या वतीने मुस्लिम बांधवांना उपवासासाठी खजूर वाटपाचा कार्यक्रम मोठ्या उत्साहात पार पडला. या उपक्रमाचा शुभारंभ राज्याचे ग्रामविकास मंत्री नामदार जयकुमार गोरे यांच्या हस्ते करण्यात आला.
मुस्लिम समाजासाठी रमजान हा पवित्र महिना असून, या काळात रोजे धरले जातात. या पवित्र महिन्याच्या समाप्तीनंतर ईद साजरी केली जाते. या पार्श्वभूमीवर, सामाजिक बांधिलकी जपत, जनश्री फाउंडेशन दरवर्षी रमजान ईद निमित्त मुस्लिम बांधवांना खजूर वाटप करत असते. फाउंडेशनचे सर्वेसर्वा व नासपचे जिल्हाध्यक्ष इंजिनिअर सुनील पोरे यांनी यावर्षीही हा उपक्रम पुढे नेला.
यावर्षी राज्याचे ग्रामविकास मंत्री नामदार जयकुमार गोरे यांच्या हस्ते जनश्री फाउंडेशनच्या वतीने म्हसवड शहरातील मुस्लिम बांधवांना खजूर वाटप शुभारंभ करण्यात आला. यानंतर फाउंडेशनच्या सदस्यांनी शहरातील मुस्लिम बांधवांच्या घरी जाऊन खजूर वाटप केले आणि ईदच्या शुभेच्छा दिल्या. या प्रसंगी जनश्री फाउंडेशनचे सदस्य, स्थानिक मान्यवर आणि नागरिक मोठ्या संख्येने उपस्थित होते.
म्हसवड शहरातील विविध सण समारंभांमध्ये सर्व जाती-धर्मांच्या नागरिकांना मदतीचा हात देण्याचे कार्य सुनील पोरे व त्यांचे कुटुंबीय सातत्याने करत आहेत. त्यांच्या या समाजसेवेसाठी मुस्लिम बांधवांनी त्यांचे विशेष आभार मानले आणि शुभेच्छा दिल्या.
या कार्यक्रमात बोलताना नामदार जयकुमार गोरे यांनी जनश्री फाउंडेशनच्या या सामाजिक उपक्रमाचे कौतुक केले. त्यांनी फाउंडेशनच्या कार्यकर्त्यांचे अभिनंदन करत असेच सामाजिक कार्य पुढे चालू ठेवावे, अशी शुभेच्छा दिली.
हा उपक्रम म्हसवड शहरातील सामाजिक ऐक्याचे प्रतीक ठरला असून, सर्व समाज घटकांनी याचे भरभरून स्वागत केले आहे. जनश्री फाउंडेशनच्या या स्तुत्य उपक्रमामुळे सर्वधर्मीय ऐक्याचा संदेश पुन्हा एकदा अधोरेखित झाला आहे.
