म्हसवड पोलिसांची धडाकेबाज कारवाई : कत्तलीसाठी नेण्यात येणाऱ्या १९ जर्सी जनावरांची सुटका, ७.२० लाखांचा मुद्देमाल जप्त

व्हिजन २४ तास न्यूज (संपादक :अहमद मुल्ला )
म्हसवड, ता. २२ –
म्हसवड पोलिसांनी गुरुवारी सकाळी एक मोठी कारवाई करत कत्तलीसाठी नेण्यात येणाऱ्या १९ जर्सी गोवंश जनावरांची सुटका केली. सहाय्यक पोलीस निरीक्षक अक्षय सोनवणे यांच्या नेतृत्वाखाली ही कारवाई करण्यात आली असून, तब्बल ७ लाख २० हजार रुपये किमतीचा मुद्देमाल जप्त करण्यात आला आहे.

याबाबत म्हसवड पोलीस ठाण्यातून मिळालेल्या माहितीनुसार

विशेष माहितीदारामार्फत मिळालेल्या गोपनीय माहितीनुसार, आरोपी दत्ता तुकाराम शिंदे (रा. सोमंथळी) हा पांढऱ्या रंगाच्या पिकअप (क्रमांक MH 11 BL 4193) वाहनातून गोवंश जनावरे घेऊन जात असल्याची माहिती मिळाल्यानंतर सोनवणे आणि त्यांच्या पथकाने तत्काळ कारवाई केली. मल्हार नगर, म्हसवड येथील बेघर वस्ती परिसरातून निघालेल्या वाहनाची तपासणी केली असता, १८ जर्सी खोंडे आणि एक जर्सी गाय अत्यंत हालाखीच्या अवस्थेत आढळून आली. त्यांच्या पायांना दोर बांधलेले होते आणि कोणतीही चारा-पाण्याची व्यवस्था नव्हती.

तपासणीदरम्यान आरोपीकडे पशुवैद्यकीय प्रमाणपत्र अथवा जनावर वाहतुकीचा कोणताही परवाना नव्हता. चौकशीतून ही जनावरे कत्तलीसाठी नेली जात असल्याचे स्पष्ट झाले. त्यानंतर आरोपीविरुद्ध म्हसवड पोलीस ठाण्यात गुन्हा दाखल करण्यात आला असून, जनावरे फलटण येथील गोपालन व गोसंवर्धन संस्थेत सुरक्षित जमा करण्यात आली आहेत.

ही कारवाई पोलीस अधीक्षक सातारा, अपर पोलीस अधीक्षक सातारा, उपविभागीय पोलीस अधिकारी (फलटण चार्ज दहिवडी) यांच्या मार्गदर्शनाखाली सहाय्यक पोलीस निरीक्षक अक्षय सोनवणे, अमर नारनवर, रूपाली फडतरे, नीता पळे, सुरेश हांगे, महावीर कोकरे, सोम गोसावी, योगेश सूर्यवंशी आणि हर्षदा गडदे यांनी केली.