ब्रह्मकुमारी संस्थेने हिंदू धर्म संस्कृतीला उजाळा देण्याचे काम तळागाळात जाऊन करावे – रामकृष्ण वेताळ

व्हिजन २४ तास न्यूज (संपादक :अहमद मुल्ला)
मसूर (ता. कराड) | कुलदीप मोहिते

मसूर येथे महाशिवरात्रीनिमित्त प्रजापिता ब्रह्माकुमारी ईश्वरीय विश्वविद्यालयाच्या वतीने विविध उपक्रमांचे आयोजन करण्यात आले. यामध्ये शालेय विद्यार्थ्यांसाठी निबंध, भाषण आणि रांगोळी स्पर्धांचे आयोजन करण्यात आले होते. या स्पर्धांना विद्यार्थ्यांनी मोठ्या उत्साहात प्रतिसाद दिला.

या उपक्रमांमुळे विद्यार्थ्यांना शिव परमात्म्याच्या तत्त्वज्ञानाचा परिचय होण्यास मदत झाली. महाशिवरात्री हा हिंदू धर्मातील एक महत्त्वाचा सण आहे आणि या निमित्ताने ब्रह्मकुमारी संस्थेच्या माध्यमातून हिंदू संस्कृतीचा प्रचार आणि प्रसार होत असल्याचे मत किसान मोर्चा महाराष्ट्र प्रदेशाध्यक्ष रामकृष्ण वेताळ यांनी व्यक्त केले.

हिंदू संस्कृतीच्या संवर्धनासाठी तळागाळात कार्य करावे – वेताळ

या कार्यक्रमात मार्गदर्शन करताना रामकृष्ण वेताळ म्हणाले, “ब्रह्मकुमारी संस्था समाजाला मानसिक स्थैर्य आणि सकारात्मक ऊर्जा देण्याचे कार्य करत आहे. आजच्या धकाधकीच्या जीवनात मानसिक ताणतणाव वाढत चालले आहेत. अशा परिस्थितीत ब्रह्मकुमारी संस्थेचे अध्यात्मिक मार्गदर्शन अत्यंत महत्त्वाचे आहे. यासोबतच, संस्थेने हिंदू धर्म आणि संस्कृतीचा प्रचार आणि प्रसार तळागाळात नेण्याचे कार्य करावे. या कार्यात आम्ही सदैव त्यांच्यासोबत राहू.”

ब्रह्मकुमारी संस्थेच्या कार्याचे पंतप्रधान नरेंद्र मोदी यांनी केले कौतुक – दिपाली खोत

लाडकी बहीण शासकीय योजनेच्या अध्यक्षा दिपालीताई खोत यांनी ब्रह्मकुमारी संस्थेच्या कार्याची प्रशंसा करताना सांगितले की, “ही संस्था देशातील दुसऱ्या क्रमांकाची मोठी आध्यात्मिक संस्था आहे. संस्थेच्या कार्याची दखल स्वतः पंतप्रधान नरेंद्र मोदी यांनी घेतली आहे. त्यांनीही या संस्थेच्या सामाजिक आणि आध्यात्मिक कार्याचे कौतुक केले आहे. व्यसनमुक्ती आणि तणावमुक्तीच्या क्षेत्रातही संस्थेचे कार्य मोलाचे आहे.”

महाशिवरात्रीच्या निमित्ताने आध्यात्मिक संदेश

या कार्यक्रमात ब्रह्मकुमारी शैलजा दीदी यांनी महाशिवरात्रीच्या आध्यात्मिक रहस्यावर प्रकाश टाकला. त्यांनी शिवतत्त्व आणि आत्मज्ञान याविषयी उपस्थितांना मार्गदर्शन केले.

कार्यक्रमाचे सूत्रसंचालन ब्रह्मकुमारी मनीषा दीदी यांनी केले, तर राजयोगी ब्रह्मकुमार संतोष भाई यांनी आभार प्रदर्शन केले. यावेळी तलाठी लता दीदी, डॉक्टर अंजली कुराडे तसेच ब्रह्मकुमारी संस्थेचे अनेक सदस्य उपस्थित होते.

या उपक्रमांमुळे विद्यार्थ्यांमध्ये आध्यात्मिकतेबाबत जागरूकता निर्माण होऊन समाजाला एक नवी दिशा मिळेल, असा विश्वास मान्यवरांनी व्यक्त केला.