दहिवडीत किराणा मालाचे दुकान फोडून पावणेपाच लाखाचा माल लंपास चोरीने घटनेने दोशी कुटुंबावर संकट , परीसरातील व्यावसायिक भयभीत

 By;दौलत नाईक                                                                                                                                                                                 दहिवडी/प्रतिनिधी :

        याबाबत घटनास्थळावरून मिळालेली माहिती अशी,मयूर,स्वागत व वैभव दोशी भाव-भावांचे दहिवडीतील एकता नगर परिसरात गोंदवले रस्त्यालगत अरिहंत किराणा स्टोअर्स  नावाचे दुकान आहे.किराणा मालाची किरकोळ व होलसेल विक्री या दुकानातून केली जाते.काल  रात्री खाद्यतेलाच्या डब्यांचा सुमारे पावणेदोन लाख रुपये किमतीचा माल दुकानात उतरवून घेऊन दोशी बंधू घरी गेले.त्यानंतर रात्री दोनच्या सुमारास ही मोठी  चोरी करण्यात आली आहे.

         चोरट्यानी दुकानाच्या मागील बाजूच्या पत्र्याची पाने कटरने कापली.याशिवाय शेजारच्या स्टील दुकानाच्या कंपाउंडचे पत्रेही दोन ठिकाणी कापून दुकानात प्रवेश केला आहे. चोरीसाठी छुपा मार्ग करून दुकानातील माल आडोशाला उभ्या केलेल्या वाहनातून चोरून नेला असण्याचा प्राथमिक अंदाज व्यक्त होत आहे. खाद्यतेलासह काजू,बदाम,खोबरे,शेंगदाणे,तांदूळ असा सुमारे पावणेपाच लाखाचा माल चोरट्यानी लंपास केला. ही अगदी नियोजनबद्ध चोरी करताना चोरट्यानी दुकानातील सीसीटीव्ही कॅमेरेही बंद केले.अन्य साहित्याबरोबर सीसीटीव्ही कमेराची यंत्रणाही चोरून नेली आहे.मात्र तत्पूर्वीच यातील स्वयंचलित कमेऱ्यातुन एका चोरट्याचे छायाचित्र दोशी यांच्या मोबाईलमध्ये प्रसारित झाले होते.

            चोरट्यानी दुकान फोडल्याची बातमी सकाळी समजल्यावर मालकांनी घटनास्थळी धाव घेतली. दहिवडी पोलीस ठाण्याच्या कर्मचाऱ्यांनीही लगेच तपासाच्या दिशेने सूत्र  हलवली.दुपारी ठसेतज्ञ व श्वान पथकानेही कसून पाहणी केली.श्वानाने दुकानाच्या मागील बाजूने मुख्य रस्त्यापर्यंत मार्ग काढला.मात्र श्वान तिथेच घुटमळले असल्याने पुढे माग निघण्याचा मार्ग धूसर झाला.या घटनेची नोंद दहिवडी पोलीस ठाण्यात झाली असून पुढील तपास सहाय्यक पोलीस निरीक्षक अक्षय सोनवणे करत आहेत.