सह्याद्रीचे शिलेदार युवा ट्रेकर्स : साल्हेरच्या शिखरावर ७६ फूट तिरंगा!

व्हिजन २४ तास न्यूज (संपादक :अहमद मुल्ला )
                    भटकंती विशेष

कुलदीप मोहिते(कराड )

सह्याद्रीच्या अभेद्य किल्ल्यांना मराठ्यांच्या शौर्याचा साक्षीदार मानले जाते. हाच ऐतिहासिक वारसा जपत सह्याद्रीचे शिलेदार – युवा ट्रेकर्स ग्रुप (मुंबई) यांनी यंदाचा ७६ वा प्रजासत्ताक दिन अनोख्या पद्धतीने साजरा केला. महाराष्ट्रातील सर्वात उंच किल्ला – साल्हेर गड सर करून तब्बल ७६ फूट तिरंगा अभिमानाने फडकवण्यात आला.

 

दुर्गसंवर्धन आणि राष्ट्रभक्तीचा अनोखा संगम

शिवरायांच्या गड-किल्ल्यांचे संवर्धन आणि स्वच्छता अभियान हाच या मोहिमेचा मुख्य उद्देश होता. दोन दिवसांत पाच गड सर करत या शिवप्रेमी गिर्यारोहकांनी देशभक्ती आणि साहसाचा संदेश दिला. या अनोख्या उपक्रमात गड संवर्धन, स्वच्छता, पाण्याच्या टाक्यांची देखभाल आणि गडाच्या ऐतिहासिक ठेव्याचे जतन करण्यावर भर देण्यात आला.

साहस आणि इतिहासाच्या साक्षीने…

२४ जानेवारी २०२५ रोजी या मोहिमेला सुरुवात झाली. पहिल्या दिवशी मुल्हेरगड, मोरागड आणि हरगड सर केल्यानंतर, दुसऱ्या दिवशी २६ जानेवारीच्या पहाटे साल्हेरच्या शिखराकडे वाटचाल सुरू झाली. कडेकपारी, उंच सुळके पार करत गिर्यारोहकांनी साल्हेर किल्ला सर करून परशुराम मंदिरात दर्शन घेतले आणि तिरंगा फडकवला.

साल्हेर – शौर्याची साक्ष देणारा किल्ला

साल्हेर किल्ला ५१४१ फूट उंचीवर स्थित असून, महाराष्ट्रातील सर्वात उंच आणि ऐतिहासिकदृष्ट्या महत्त्वाचा किल्ला आहे. १६७२ मध्ये याच किल्ल्यावर मराठ्यांनी मुघलांवर ऐतिहासिक विजय मिळवला होता. गडावर मारुती मंदिर, परशुराम मंदिर, गंगासागर तलाव, हत्तीचा हौद आणि प्राचीन गुहा आजही इतिहासाची साक्ष देत उभ्या आहेत.

पर्यावरणपूरक भटकंतीचा संदेश

गडांवर प्लास्टिक कचरा टाकला जाऊ नये, म्हणून सह्याद्री शिलेदार ट्रेकर्स प्रत्येक मोहिमेत स्वच्छता मोहीम राबवतात. गिर्यारोहकांनी साल्हेर गड प्लास्टिक मुक्त ठेवत परतीच्या वाटेवर गोळा केलेला कचरा खाली आणला. यामुळे गड आणि निसर्गनिर्मित वारसा स्वच्छ व सुंदर राहण्यास मदत होते.

गिर्यारोहकांचे साहसी योगदान

या मोहिमेचे नियोजन रायगड जिल्ह्यातील गिर्यारोहक अमोल परशुराम देवे आणि प्रशांत धोकटे यांच्या मार्गदर्शनाखाली करण्यात आले. मोहिमेत सहभागी झालेल्या गिर्यारोहकांमध्ये प्रतिक पालशेतकर, निलेश धोकटे, अमोल जाधव, योगेश शर्मा, राकेश सोनी, राहुल रांजाणे यांचा समावेश होता.

गड-किल्ल्यांचे संवर्धन ही आपली जबाबदारी!

छत्रपती शिवाजी महाराजांनी जपलेले हे गड-किल्ले ही आपली ऐतिहासिक ओळख आणि संस्कृतीचा अभिमान आहे. अशा मोहिमा गिर्यारोहकांसाठी साहस, इतिहास आणि पर्यावरण जपण्याचा अद्भुत अनुभव देतात. सह्याद्री शिलेदार ट्रेकर्सचा हा उपक्रम तरुणांना प्रेरणा देणारा असून, गड संवर्धनाच्या दिशेने एक महत्त्वाचे पाऊल आहे.